कहाँ आउँछ र तीज ?

बिहान झिसमिसेमै पँधेरा गई नुहाएर

रंगीचंगी नयाँ लुगा लगाएर

बजारमा लागेको जात्रा हेर्न

दिदीबहिनीको एक हुलसँगै दौडिन्थेँ म ।

पल्लाघरे ममता र अर्चनाहरु

तीजका गीत गाउँथे

पूजा, निशा र सुशिलाहरु छमछमी नाँच्थे

जाने नि नजाने नि तान्न आउथे

मेरा हात

हल्लाउथेँ म पनि जिउ

हाँस्थे सिउँदोको सिन्दुर र टीका,

बज्थे चुरा र पाउजू,

लर्कन्थे फूलबुट्टे सारी ।

आज वर्षौं भयो,

त्यस्तो तीज फेरि आएन

बरु तीजको मुखैमा समाचार बनेर आए

निर्मला र भगिरथहरुको बलात्कारको घटना

हिंसामा परि मारिइन् ममता र नवोदिता

दाइजोको नाममा जले खुश्बु र परी

बोक्सीका नाममा दिसा खान बाध्य भइन् मरनीदेवी

सृष्टिहरुका अनुहारमा खन्याइए तेजाब ।

आफ्नै दिदीबहिनी र आमाहरुमाथि अन्याय हुँदा

बलात्कार हुँदा र मारिँदा

कसरी,

आउँछ मलाई तीज ?

कसरी ल्याउनु तीजको रौनक ?

एउटाको आँखामा आँसु देख्दादेख्दै

कसरी आउँछ हाँसो ?

कसरी सजिनु, चुरा र पोतेमा ?

पल्लाघरकी काकी माथि वर्षौं भयो रातो निषेध भएको

कसरी लगाउनु रातो साडी ?

आजकल,

तीज, तीज मात्रै बनेर आउन्न

लेराउँछ विधवाका आँसु

खोस्छ माइती नभएकाका हाँसो

चेली विनाको घरमा पनि कहाँ आउँछर तीज ?

तीज त आजकल,

घाइते भएको छ

बलात्कृत भएको छ

दाइजोको नाममा जलेको छ

बोक्सीकोे नाम कुटिएको छ,

पिटिएको छ

यस्तो अवस्थामा तीज,

कहाँ आउँछ र ?

– नुवाकोट-१, विदुर ।