विवादबीच वाईसीएल अध्यक्ष चुनिएका वलीलाई प्रश्‍न- चुनाव गर्न केले रोक्‍यो ?

१८ जेठबाट सुरु भएको नेकपा माओवादी केन्द्रको सहायक संगठन योङ कम्युनिस्ट लिग (वाईसीएल) को तेस्रो सम्मेलनले पूर्ण कमिटी आइतबार साँझसम्म पाएको छैन । निर्धारित समयभित्र सम्पन्न हुन नसकेको सम्मेलनबाट शुक्रबार अबेर साँझ सहमतिमा पुष्प वली अध्यक्ष चुनिए । अध्यक्ष टुंगिए पनि असन्तुष्टिका स्वरहरू संगठनभित्र सुनिन सुरु भइसकेका छन् ।

 वाइसीएलका नवनिर्वाचित अध्यक्ष वलीसँग सम्मेलन र भावी योजनाबारे अनलाइनखबरकर्मी लिलु डुम्रेले गरेको कुराकानी :

निर्धारित समयमा सम्मेलन सकिएन । तीन दिन लम्बिएको तेस्रो सम्मेलनबाट अध्यक्षमा तपाईंको नाममा सहमति जुट्यो । अरु १३ जना आकांक्षीमा तपाईं सहमतिमा अध्यक्ष बन्ने अवस्था कसरी बन्यो ?

तेस्रो राष्ट्रिय सम्मेलनमा अध्यक्षका आकांक्षी १३ जना हुनुहुन्थ्यो । अरु १२ जनाले समर्थन गरेर म सर्वसम्मत अध्यक्ष बनें ।

पार्टी अध्यक्ष प्रचण्डले सम्मेलनको उद्घाटन गर्दा नयाँ ढंगले संगठित गर्नको निम्ति यो संगठनलाई अलि बढी महत्व दिनुभयो । संगठनभित्र विभाजन आउन नहुने र तपाईंहरू सबै मिलेर सर्वसम्मत नेतृत्व चयन गर्नुहोस् भन्ने कोणबाट निर्देश गर्नुभएको थियो । त्यही रफ्तारका साथ छलफल भयो ।

सबै साथीहरूले समर्थन गरेर मलाई अध्यक्ष बनाउनुभयो । एउटा राम्रो सन्देश गएको छ । मेरो नेतृत्वको कमिटीले संगठनमा ऊर्जा थप्न र गतिशील बनाउन राम्रो काम गर्नेछ ।

सिनियरिटीलाई आधार बनाउँदा उपाध्यक्षको नाममा सहमति जुट्नुपर्ने तर तपाईं उपमहासचिवबाट अध्यक्ष हुनुभयो । के गुण पार्टीले हेर्‍यो र अध्यक्षमा तपाईंमा सहमति जुट्यो ?

उपमहासचिव पनि सिनियरिटीकै लेबल हो । हामी साबिक पदाधिकारी नै, पुरानै पदाधिकारीको र्‍याङ्किङलाई उपमहासचिवमा लगेर राखेको हो । पार्टीको सहायक संगठन भएको हुँदा उहाँहरूको पनि चासो त हुने भइनै हाल्यो ।

महत्वपूर्ण के छ भने, आकांक्षीमध्ये १३ जनामा अरु ११ जनाले मलाई समर्थन दिएपछि पार्टी नेतृत्व पनि त्यतातिर निर्णय गर्न पुग्यो भन्ने लाग्छ ।

निर्वाचनबाट नेतृत्व चयन गर्न किन तयार हुनुभएन ?

सर्वसम्मत भनेको पनि सबैले अनुमोदन गरेरै चुनिने हो । आकांक्षीहरू कोही त्यसमध्येबाट सर्वसम्मति दिनुभएन, उहाँहरूले नमान्दिनु भएको भए निर्वाचनमा जाने विधि त हामीसँग छँदै थियो । हाम्रो कार्यविधि, विधान हरेक कुराले भन्छ नै ।

संगठनमा निर्वाचन गरेर पनि आयौं नि । नुवाकोटको जिल्ला समिति निर्वाचनबाट चुनियो । लुम्बिनी प्रदेशको प्रदेश समिति निर्वाचनबाट चुनियो । अन्यत्रतिर सहमति भयो । सहमति भनेको त झन् राम्रो कुरा होला नि ।

लोकतन्त्रमा सबभन्दा राम्रो त सबैले मान्दिएर नेतृत्व चयन गर्ने विधि होला । निर्वाचनले एउटा हार्ने, एउटाले जित्ने हुने थियो । यसमा त सबैले जित्नुभयो । निर्वाचन प्राविधिक विषय हो भन्ने लाग्छ । सर्वसम्मत हुँदा पनि कमिटी दिने त हो ।

पछिल्लो समय त पार्टीमा समूह-समूहको कुराहरू सुनिन्छ । तपाईं बलियो समूहमा रहेर अध्यक्ष बनेको बुझ्न सकिन्छ ?

म त पार्टीकै मान्छे हो । यो समूह भन्ने त अब कहीँ कतै सुनिने कुरा होलान् । हाम्रो संगठनमा समूह देखिएको छैन । त्यस्तो हुने थियो भने सर्वसम्मत कसरी गर्न सक्थ्यौँ होला र ? समूह भएको देखिएन ।

जीवन्त संगठनमा अन्तर्विरोध हुन्छन् । त्यसलाई नयाँ ढंगले हेरिनुपर्छ भन्ने हो । संगठनको सबभन्दा सर्वोच्च निकाय भनेको राष्ट्रिय सम्मेलन हो । राष्ट्रिय सम्मेलनबाट निर्वाचित कमिटी आइसकेपछि अब यी अन्तर्विरोधहरू सबै अब नयाँ ढंगले जान्छन् ।

समूह भन्ने त धेरै टाढाको कुरा हो । पार्टी नै हो मूल कुरा । पार्टीको सहायक संगठन, सेना संगठनले पार्टीको निर्देशन र कार्यक्रम मानेर नेतृत्वलाई रक्षा गर्न सधैं अगाडि बढ्छ ।

बल्लतल्ल अध्यक्षमा सहमति त बन्यो । निर्वाचन आयोगले तपाईंहरूलाई आधिकारिक पत्र प्रदान पनि गरेको छैन । किन ढिलो भयो ?

राम्रो गर्नलाई नै समय लागेको हो भन्ने हिसाबले बुझौं न ।

वाइसिएलका नेताहरूलाई व्यवस्थापन गर्न विधान संशोधन गर्न लाग्नुभएको हो ?

हैन हैन । पार्टीलाई नै हामीले भनेका छौँ । को-को, कता-कता, कुन-कुन कमिटीमा गर्नुपर्ने हो, त्यसमा पार्टीले नै निर्णय गरेर देओस् । विधान संशोधन नगरी पार्टी नेतृत्वसँग सरसल्लाह गरेर भूमिका मिलाउँछौं ।

नयाँ कमिटी गठनप्रति विरोधका स्वर त सुनिएका छन् । सर्वसम्मत हुँदा असन्तुष्टि सामाजिक सञ्जालमा पोखिनुपर्ने हो र ?

यति धेरै संख्या सहभागी भएको सम्मेलनमा अलिअलि असन्तुष्टि त हुने भइहाल्यो । केही ल्याउनैपर्ने साथीहरू पनि हाम्रो विधानमा भएको व्यवस्थाअनुसार ल्याउन सकिराखेका छैनौँ ।

केही साथी छुटिराख्नुभएको छ । पर्नैपर्ने साथीहरू नपर्ने, केही नपर्ने साथीहरू पर्दा असन्तुष्टि पनि सुनिन्छन् । केही साथीहरूको जिम्मेवारीको विषयमा केन्द्रीय कमिटीले निर्णय गर्नेछ । उहाँहरूको विषयमा सम्बोधन हुनेछ । साथीहरूलाई धैर्य गर्न अनुरोध गर्छु ।

एक समयको चर्चित युवा संगठन आजकल अलि कमजोर हुँदै गएको देखिन्छ । युवा संगठनहरूको साख गु्म्दै गएको बेला संगठनलाई प्रभावकारी बनाउने तपाईंसँग योजना के छन् ?

राष्ट्रिय सम्मेलन गर्दै गर्दा नवप्रवर्तन, स्वरोजगार, उद्यमशिलता लगायतका मुद्दा उठाएका छौं । स्वरोजगारका लागि युवा आन्दोलन भनेका छौं । सम्मेलनबाट यी अजेन्डा अनुमोदित भएका छन् । अब व्यवहारतः लागु गर्नुपर्नेछ ।

सुशासन, सामाजिक न्याय, समृद्धिका मुद्दालाई अघि बढाउँछौं । युवाका तमाम समस्या छन् । यिनीहरूलाई विस्तृत रूपमा छलफल गरेर यी समस्याहरू समाधान गर्ने कार्यमा संगठन योङ कम्युनिस्ट लिग लाग्नेछ । वाईसीएल भन्ने बित्तिकै कम्युनिस्ट युवाहरूलाई संगठित गर्ने संगठन हो । कम्युनिस्ट आचरण भएका युवालाई हामी संगठित गर्छौं ।

वाईसिएलले कम्युनिस्ट युवाहरूलाई संगठित गर्छ । निम्नवर्गीय जो शोषण उत्पीडनमा परेको वर्गलाई तिनीहरूको रक्षा गर्नको निम्ति, तिनीहरूलाई विकास गर्नको निम्ति र तिनीहरूको हरेक समस्याको समाधानको एउटा सशक्त माध्यम वाईसिएल बन्छ । बनाइन्छ । नयाँ ढंगले नयाँ कार्यक्रमहरू हामी छलफल गरेर अगाडि बढ्छौँ ।

यो पनि पढ्नुहोस

वाईसीएलको जम्बो कार्यसमिति : २२ उपाध्यक्ष, ३१ सचिव