पोखरामा भेटिएका हायू परिवार भन्छन्- सिन्धुली फर्कन्नौं, धेरै बिरामी पर्‍यौं

१२ साउन, काठमाडौं । सिन्धुलीको गोलन्जोर गाउँपालिका–६ छेत्पा नजिक भण्डास बिप्पर कटेरी भन्ने ठाउँमा बसोबास गर्ने उर्मिला हायूको परिवारका १६ जना अन्तत: पोखरामा भेटिएका छन् ।

जिल्ला प्रहरी कार्यालय, कास्कीका एसपी श्यामबाबु ओलियाका अनुसार, पोखरा महानगरपालिका–३० स्थित दुई वटा घरमा बाँडिएर बसेको अवस्थामा उनीहरू भेटिएका हुन् ।

गत शनिबार नै पोखरा पुगेका उनीहरू उक्त दिन लेकसाइडस्थित होटल जननीमा पुगेका थिए । होटलका सञ्चालक सुनिल भूर्तेलका अनुसार, सो दिन उनीहरू तीन वटा कोठा लिएर बसेका थिए ।

उनीहरू आइतबार नै त्यहाँबाट निस्किएका थिए ।

आज (सोमबार) बिहान एकै परिवारका १६ जना बेपत्ता भएको खबर अनलाइनखबरले प्रकाशित गरेको थियो । त्यसपछि प्रहरी, प्रशासन, स्थानीय जनप्रतिनिधिसहितको टोली खोजी कार्यका लागि सक्रिय भएको थियो ।

अन्तत: साँझ उनीहरू पोखरा पुगेको भेटिए । अहिले उनीहरूलाई प्रहरीले नियन्त्रणमा लिएर सोधखोज गरिरहेको छ ।

उनीहरू इलाका प्रहरी कार्यालय सिसुवाको सम्पर्कमा रहेको एसपी ओलियाले बताए ।

प्रहरी स्रोतले बताए अनुसार, उनीहरूले सिन्धुलीको उक्त घरमा आफूहरू बिरामी पर्न थालेपछि नयाँ ठाउँको खोजीका लागि पोखरा पुगेको बताएका छन् ।

‘सिन्धुलीको त्यो ठाउँमा हामी बिसन्चो भइरहेने भएको कारणले हामी नयाँ ठाउँमा आएका हौं भनेका छन्,’ प्रहरीसमक्ष उनीहरूले बताएका छन् ।

पटकपटक बिरामी पर्ने र उपचारका लागि अस्पताल जान पनि असहज भएपछि त्यहाँबाट हिँडेको उनीहरूले प्रहरीलाई बताएका छन् ।

सिन्धुली फर्कन छैनन् तयार

प्रहरीका अनुसार, उनीहरूले सिन्धुली फर्कन तयार नभएको बताइरहेका छन् । ओलीया भन्छन्, ‘उहाँहरू सिन्धुली फर्कन तयार हुनुहुन्नँ ।’

आफूहरूलाई सिन्धुलीको उक्त क्षेत्रभन्दा अन्यत्र नै बस्ने व्यवस्था मिलाइदिन उनीहरूले आग्रह गरेका छन् ।

‘हामी यतै बस्छौं । उता, जाँदैनौं,’ हायू परिवारका सदस्यको भनाइ उद्धृत गर्दै ओलियाले अनलाइनखबरसँग भने ।

ज्यामी काम गर्ने भन्दै लिएका थिए शरण

सिन्धुलीका उक्त परिवारका सदस्यहरू पोखरा महानगरपालिका–३० स्थित गगनगौंडा भन्ने ठाउँमा भेटिएका थिए ।

स्थानीय सोमनाथ पौडेल र चन्द्र भण्डारीको घरमा भेटिएका हुन् । ‘दुईवटा घरमा बाँडिएर बसेका रहेछन्,’ एसपी ओलियाले भने ।

उनीहरू आफूहरू ज्यामी काम गर्नका लागि आएको भन्दै पौडेल र भण्डारीको घरमा बसेका थिए ।

‘हामी ज्यामी काम गर्न आएका हौं भन्दै उहाँहरू ती घरमा बस्नुभएको रहेछ,’ ओलियाले भने ।

यो पनि पढ्नुहोस

पोखराको गगनगौंडामा भेटिए सिन्धुलीका १६ जना, दुई घरमा बाँडिएर बसेका थिए

यो पनि पढ्नुहोस

शुक्रबार साँझ अटो चढेर ग्वालटारबाट फर्किएका थिए बेपत्ता परिवारका सदस्य

यो पनि पढ्नुहोस

यी हुन् सिन्धुलीबाट बेपत्ता भएका एकै परिवारका १६ जना (नामावली)

यो पनि पढ्नुहोस

एकै परिवारका १६ जना गाउँबाटै हराएपछि…

यो पनि पढ्नुहोस

मोबाइल अफ हुनुअघि बेपत्ता हायू परिवारको अन्तिम लोकेसन रामेछापको सिमन्दीछाप

यो पनि पढ्नुहोस

घरमै सुँगुर काटेर खाएको दिनदेखि सम्पर्कविहीन, रामेछापमा पनि खोजी सुरु