शेरबहादुरलाई भेटेर निस्किएका शशांकले भने : पार्टी विभाजन रोक्ने प्रयास हुँदैछ

News Summary

Generated by OK AI. Editorially reviewed.

नेपाली कांग्रेसका नेता डा.शशांक कोइरालाले पार्टी विभाजन रोक्ने प्रयास भइरहेको बताएका छन्।
सभापति शेरबहादुर देउवाको निवासमा भएको छलफलपछि उनले 'मिलाउने प्रयास हुँदैछ' भने।
विशेष महाधिवेशन नेतृत्व चयनतर्फ गएको संकेतपछि विभाजन रोक्न देउवा र अन्य नेताहरू छलफल गरिरहेका छन्।

२८ पुस, काठमाडौं । नेपाली कांग्रेसका नेता डा.शशांक कोइरालाले पार्टी विभाजन रोक्ने प्रयास भइरहेको बताएका छन् । सभापति शेरबहादुर देउवाको निवासमा भएको छलफलपछि बाहिरिनेक्रममा सञ्चारकर्मीहरूसँग संक्षिप्त कुराकानी गर्दै उनले यस्तो बताएका हुन् ।

उनले भने, ‘मिलाउने प्रयास हुँदैछ । पार्टी कुनै हालतमा पनि ब्रेक गर्न हुँदैन भन्ने कुरा भयो ।’ उनले अन्य नेताहरूसँग छलफल गरिरहँदा शेखर कोइराला पनि आएको र विभाजन रोक्नेबारे कुरा गरेको बताए ।

नेपाली कांग्रेसको विशेष महाधिवेशन भृकुटीमण्डपमा जारी छ । आइतबार उद्घाटन सत्र भएको थियो भने आज बन्दसत्र जारी छ । बन्दसत्रमा महामन्त्रीद्वय गगनकुमार थापा र विश्वप्रकाश शर्मासहितका नेताहरू छन् । कांग्रेसका ५४ प्रतिशत महाधिवेशन प्रतिनिधिले माग गरेको विशेष अधिवेशन सभापति देउवासहितका नेताले बेवास्ता गरेपछि महामन्त्रीद्वयले आह्वान गरेका थिए ।

विशेष महाधिवेशन नेतृत्व चयनतर्फ गएको संकेत पाएपछि देउवा र विशेष महाधिवेशनको पक्षमा नरहेका नेताहरू पार्टी विभाजन रोक्न भन्दै छलफल गरिरहेका छन् ।