पेट मात्रै होइन शरीरका अन्य अंगमा पनि असर गर्छ झाडापखालाले

गर्मीको समय सुरु भएको छ । गर्मीसँगै वर्षा पनि सुरु हुँदैछ । यो समयलाई सरुवा रोगको मौसम पनि मानिन्छ । अब दूषित खाना र पानीसँग जोडिएका सरुवा रोगको जोखिम बढी हुन्छ ।

सानो लापरबाही, जस्तै फोहोर पानी पिउनु, खुला ठाउँमा राखिएको खाना खानु वा हात नधुनुले झाडापखाला जस्ता पाचन सम्बन्धी रोगहरू निम्त्याउन सक्छ । गर्मीमा झाडापखालाका केसहरू विशेष रूपमा बढ्छन् । यो समस्या बच्च, वृद्धवृद्धा र रोग प्रतिरोधी क्षमता कमजोर भएका व्यक्तिहरूका लागि गम्भीर हुन सक्छ ।

झाडापखालालाई प्रायः सामान्य पेटको गडबडी ठानेर बेवास्ता गरिन्छ, तर यसले शरीरमा धेरै तहमा असर गर्छ । लगातार पातलो दिसा हुँदा शरीरबाट पानी र आवश्यक खनिजहरू छिटो बाहिर निस्कन्छन्, जसले डिहाइड्रेसन र कमजोरी निम्त्याउँछ ।  यस्तो अवस्थामा मानिसहरूको मनमा प्रश्न उठ्छ कि के झाडापखाला केवल पेटमा मात्र सीमित हुन्छ, वा यसले शरीरका अन्य अङ्गहरूलाई पनि असर गर्छ ?

झाडापखालाले शरीरका कुन कुन अंगलाई असर गर्छ ?

झाडापखाला त्यस्तो अवस्था हो, जसमा व्यक्तिलाई दिनमा तीन वा त्यसभन्दा बढी पटक पातलो वा पानीजस्तो दिसा हुन्छ । यो अचानक पनि हुन सक्छ वा लामो समयसम्म रहन सक्छ ।  यससँगै पेट दुख्ने, वाकवाकी लाग्ने, ज्वरो आउने र शरीर कमजोर हुने जस्ता लक्षणहरू देखिन सक्छन् ।

झाडापखालाको सबैभन्दा प्रत्यक्ष असर हाम्रो सानो र ठूलो आन्द्रामा पर्छ ।  जब ब्याक्टेरिया, भाइरस वा परजीवीले आन्द्रामा सङ्क्रमण गर्छ, आन्द्राको भित्री तह सुन्निन्छ र तिनको कार्यमा अवरोध हुन्छ । यसले पाचन प्रक्रियामा गडबडी हुन्छ र पानीको अवशोषण हुन सक्दैन, जसले दिसा पातलो बन्न थाल्छ ।

मिर्गौलालाई पनि असर

झाडापखालाको समयमा शरीरबाट धेरै मात्रामा पानी र सोडियम, पोटासियम जस्ता इलेक्ट्रोलाइट्स बाहिर निस्कन्छ ।  यदि समयमै यसको पूर्ति गरिएन भने, शरीर डिहाइड्रेट हुन्छ । यसको प्रत्यक्ष असर मिर्गौलामा पर्छ । किनभने, मिर्गौलालाई रगत छान्ने र विषाक्त पदार्थ बाहिर निकाल्ने कामका लागि पर्याप्त पानी चाहिन्छ ।

मांसपेशीमा कस्तो क्षति पुर्‍याउँछ ?

झाडापखालाले शरीरमा इलेक्ट्रोलाइट्सको कमी हुँदा मांसपेशी मडारिने कमजोरी र थकान महसुस हुन्छ ।  यो समस्या विशेष गरी बच्चाहरूमा धेरै देखिन्छ ।

छालाको समस्या पनि निम्त्याउँछ

झाडापखालाले शरीरमा पानीको कमी हुँदा छालामा असर पर्छ । छाला सुख्खा र मलिन देखिन थाल्छ र ओठहरू पनि सुख्खा हुन्छन् ।

कलेजोको कार्यलाई कसरी असर गर्छ ?

यदि झाडापखालाको कारण भाइरल वा ब्याक्टेरियल सङ्क्रमण हो भने, यो कलेजोसम्म पुग्न सक्छ, विशेष गरी यदि यो लामो समयसम्म रह्यो भने ।  कलेजोले शरीरका विषाक्त पदार्थहरू सफा गर्ने काम गर्छ, तर झाडापखालाले शरीर कमजोर हुँदा कलेजोमा दबाब बढ्छ र यसको कार्यक्षमता पनि प्रभावित हुन सक्छ ।

बालबालिका र वृद्ध वृद्धाका लागि बढी जोखिम

साना बच्चाहरू र वृद्धवृद्धाको रोग प्रतिरोधक क्षमता कमजोर हुन्छ । साथै, उनीहरूको शरीरले पानीको कमी सहन सक्दैन, त्यसैले झाडापखाला उनीहरूका लागि बढी  जोखिमपूर्ण हुन सक्छ । बच्चाहरूमा यो समस्याले कुपोषण पनि निम्त्याउँछ, किनभने लामो समयसम्म झाडापखाला हुँदा पोषक तत्त्वहरूको अवशोषण रोकिन्छ ।