धुर्मुस सुन्तलीले बनाउने क्रिकेट रंगशालाका लागि जेठभित्रै ३० करोड चाहिने

२९ वैशाख, चितवन चितवनको रामपुरमा निर्माण गर्न थालिएको गौतमबुद्ध अन्तर्राष्ट्रिय क्रिकेट रङ्गशाला निर्माणका लागि जेठभित्र ३० करोड रुपैयँ आवश्यक पर्ने भएको छ । रंगशाला निर्माणको जिम्मा लिएको धुर्मुस सुन्तली फाउण्डेशनका अध्यक्ष सीताराम कट्टेल (धुर्मुस) ले आइतबार चितवनमा पत्रकार सम्मेलन गरी मसान्तसम्ममा ३० करोड रुपैयाँ आवश्यक पर्ने बताएका हुन् ।

हालसम्म ६ करोड ५० लाख रुपैयाँको प्रतिवद्धतामात्र आएको छ । त्यो पनि सबै रकम उठिसकेको छैन । भदौ महिनामा औपचारिक शिलान्यास गर्नका लागि आवश्यक कच्चापदार्थ खरिद गर्न ठूलो रकम आवश्यक परेको हो । रङ्गशाला क्षेत्रलाई टिनले बार्ने, निर्माण गर्दा आवश्यक पर्ने कार्यालय निर्माण, कर्मचारी आवास गृह, गोदाम घर, सुरक्षाकर्मी घरलगायत आवश्यक संरचना निर्माण भइसकेको कट्टेलले बताए ।

मैदान बनाउनका लागि काठमाडौँका दुई स्थानबाट परीक्षण गरी माटो ल्याइएको छ भने तनहुँबाट पनि माटो ल्याउने तयारी भइरहेको उनले बताए । मैदानसँगै दुबो रोप्नका लागि ब्याडमा दुबो हुर्काउने काम शुरु गरिएको छ । पहिलो चरणमा मैदान तयार गरी प्याराफिट र अन्य काम अघि बढाउने तयारी गरिएको छ ।

कट्टेलले आर्थिक सहयोगका लागि देशभर अभियान शुरु हुने क्रममा रहेको बताउँदै कतिपय जिल्लामा सहयोग समिति बनेर रकम सङ्कलन हुन थालेको बताए । चितवनमा जिल्ला, महानगर, नगर, गाउँपालिका र वडास्तरीय सँगै विभिन्न सरोकारवाला निकायको छुट्टाछुट्टै समिति निर्माण गरी आर्थिक सङ्कलन अभियानलाई तीव्रता दिने तयारी छ ।

यससँगै सबै जिल्लामा समिति निर्माण गरी रङ्गशालाको अपनत्व लिने गरी आर्थिक सहयोग अभियानलाई तीव्रता दिइने उनले बताए । बहुउपयोगी रङ्गशला निर्माणमा तीन अर्ब रुपैयाँ लाग्ने धुर्मुस–सुन्तली फाउण्डेशनले जनाएको छ । अहिले बन्न लागेको रङ्गशालामा ३५ खेल खेलाउन सकिनेछ । त्रिभुवन विश्वविद्यालयको नाममा रामपुरमा रहेको २० बिघा ६ कट्ठा जग्गामा रङ्गशाला निर्माण गर्न लागिएको हो ।