३० डोटी, वैशाख । डोटी कारागारभित्र स्थापना गरिएको पुस्तकालयको उद्घाटन गर्न पुगेकी दिपायल सिलगढी नगरपालिका प्रमुख मञ्जु मलासीलाई आफ्नो पीडा पोख्दै कैदी बन्दी दिपेन्द्र जेठाराले भने, ‘भवन चुहिन्छ, हामीले सिलिङ्गमा प्लाष्टिक ठोकेका छौं, पानी पर्यो भने राती उठेर प्लाष्टिकमा भरिएको पानी बाल्टीमा खन्याउँदै रात बिताउँछौं ।’
वर्षातको बेला त सधैं जाग्राम बस्नु पर्ने अवस्था रहेको दिपेन्द्रले वताए । ‘जम्मा २५ जना क्षमताको कारागारमा हामी ५१ जना बसेका छौं” उनले थपे ‘न खेल्ने मैदान छ, न कुनै अरु सुविधा ।’
कारागारलाई पछिल्लो समयमा सुधार गृह भन्ने गरिएको छ तर यस्तो ठाउँमा कैदीहरु कसरी सुधि्रन्छन् भन्ने प्रश्न जेठाराले गरे । कारागारका नाईके समेत रहेका उनले भने, ‘छानो चुहिएर भिजेका लुगाहरु बर्खामा त कयौं दिनसम्म सुक्दैनन् ।’
छाना मर्मत मात्रै गरिदिए पनि आफुहरु राति सुख साथ निदाउन सक्ने वताउँछन् अर्का कैदी महेश्वर ओझा । उनी थप्छन्, ‘कैदीलाई श्रममा लगाउने भन्ने पनि सुनेको थिए तर हामीलाई त बस्ने ठाउँ पनि राम्रो छैन ।’ उनी दैनिक ६० रुपैयाँ सिदामा चुहिने छानामूनी बस्नको पीडा आफूले व्यक्त पनि गर्न नसकिरहेको वताउँछन् ।
जवाफमा नगर प्रमुख मञ्जु मलासीले कारागारको नयाँ भवन बनाउनका लागि जग्गा खोजी भईरहेको वताईन् । ‘यो भवन जीर्ण भइसक्यो, नयाँ भवन वनाउनका लागि यो जमिनले पुग्दैन’ उनले भनिन् ‘नयाँ मापदण्ड अनुसारको कारागारको भवन बनाउने कुरामा हामी प्रयासरत छौं ।’
उनले कारागार वनाउने बिषयमा प्रदेश आन्तरिक मामिला तथा कानून मन्त्री प्रकाश शाहसँग छलफल भइरहेको बताइन ।
नयाँ भवन निर्माण गर्न समय लाग्ने भएका कारण तत्काल मर्मतका लागि आफूले नगरपालिकाको तर्फबाट पहल गर्ने मलासीले जानकारी दिइन ।
भवनको अवस्थाले आफु कारागारभित्र आउँदा जहिले पनि भावुक हुने गरेको निमित्त प्रमुख जिल्ला अधिकारी टेकनारायण पौडेलले वताए । ‘भवनको अवस्था यस्तो छ, कैदीहरुका लागि खेल्ने ठाउँ छैन, समय कसरी बिताउने ?’ पौडेलले भने, ‘तपाईहरुले भोगिरहेको पीडा अनुभूत गर्न खोज्दा भावुक हुन्छु म ।’
उनले नयाँ भवन निर्माणका लागि प्रयास भइरहेको बताउँदै भने, ‘कैदी बन्दीहरुले एकआपसमा झगडा नगरी मिलेर बस्न हुन आग्रह गर्दछुं, जे जसरी तपाईहरु यो भित्र आउनु भएको छ, अव एक परिवार भएर बस्नुहोस् ।’
डोटीका प्रहरी प्रमुख प्रहरी उपरीक्षक विद्यानन्द माझीको पहलमा स्थापना गरिएको उक्त पुस्तकालयका लागि पूर्वीचौकी गाउँपालिकाका अध्यक्ष दिर्घराज बोगटीले र्याक र जिल्ला प्रशासन कार्यालयबाट दराज उपलव्ध गराइएको सामुदायिक प्रहरी सेवा केन्द्रका उपाध्यक्ष सिद्धराज जोशीले बताए ।
उनले प्रहरी कार्यालय, जिनियस निरौला र सञ्चारकर्मीहरुबाट पुस्तकहरु प्राप्त भएको बताए ।
