१५ भदौ,काठमाडौं । स्वास्थ्य उपचारका लागि सिंगापुरमा रहेका प्रधानमन्त्री केपी शर्मा ओलीको प्लाज्मा फेरेसिस प्रक्रियाबाट थालिएको नयाँ उपचार प्रक्रिया आगामी बुधबारसम्म जारी रहने भएको छ ।
हालसम्म पाँच पटक सोही प्रक्रियाबाट मिर्गौलासम्बन्धी एन्टीबडीलाई निराकरण गरिएको छ । सोमबार छैटौं र बुधबार सातौं चरणको प्रक्रिया सम्पन्न भएसँगै उपचार पूरा हुने प्रधानमन्त्रीका प्रेस सल्लाहकार कुन्दन अर्यालले जनाएका छन् ।
प्रधानमन्त्रीको उपचारमा संलग्न निजी चिकत्सक डा. दिलिप शर्मालाई उधृत गर्दै प्रेस सल्लाहकार अर्यालले हाल प्रधानमन्त्रीको स्वास्थ्य अवस्था सामान्य रहेको जनाएका छन् । प्रधानमन्त्री गत भदौ ५ गते दोस्रो चरणको स्वास्थ्य उपचारका लागि सिंगापुर प्रस्थान गरेका थिए ।
सम्माननीय प्रमको प्लाजा फेरेसिस प्रकृयाबाट मृगौलासम्बन्धी एन्टबडीलाई निराकरण गर्ने उपचार जारी छ। प्रमसँगै रहनुभएका उहाँका निजी चिकित्सक डा दिलिप शर्माका अनुसार भोलि सोमबार छैठौं र बुधबार सातौं चरणको प्रकृया सम्पन्न भएसँगै उपचार पूरा हुनेछ। प्रमको स्वास्थ्य अवस्था सामान्य छ।
— Kundan Aryal (@TheRealKalamchi) September 1, 2019
प्रधानमन्त्रीको मृगौलासम्बन्धी एण्डीबडीको मात्र केही बढी देखिएपछि दोस्रो चरणको उपचारका लागि सिंगापुर लगिएको थिाये । एण्टीबडीलाई शरीरबाट निश्कासन गरी निराकरण गर्ने उपचार विधिलाई निरन्तरता दिन उनी सिंगापुरमा छन् ।
गत साउन १८ देखि २७ गतेसम्म सिंगापुरको न्यासनल युनिभर्सिटी अस्पतालमा ओलीको स्वास्थ्य परीक्षण गरिएको थियो । यसपटक पनि सोही अस्पतालमा विज्ञहरुको टोलीले मिर्गौलाको थप परीक्षण र क्षमता अभिवृद्धिको लागि उपचार भइरहेको छ ।
