भक्तपुरमा सेल्फी खिच्दै चिनियाँ विदेशमन्त्री : मलाई पर्यटकजस्तै बन्न दिनुस् !

२४ भदौ, काठमाडौं । नेपाल भ्रमणमा रहेका चिनियाँ विदेशमन्त्री वाङ यी मंगलबार बिहान भक्तपुर दरबार स्क्वायर पुग्दा अनौपचारिक पोशाकमा थिए ।

सामान्य पर्यटक जसरी बनेर उनले भक्तपुर दरबार क्षेत्र, न्यातपोल मन्दिर, दत्तात्रय मन्दिर लगायतका ठाउँहरु अवलोकन गरे ।

उनले भक्तपुर क्षेत्र अवलोकन मात्र गरेनन्, ऐतिहासिक सम्पदालाई आफैंले आफ्नो क्यामरामा कैद गरे । उनले सेल्फी पनि खिचे ।

चिनियाँ विदेशमन्त्री वाङ यीको आग्रहअनुसार भक्तपुर क्षेत्र अवलोकन भ्रमण गरेको तस्वीर नखिच्न पत्रकारलाई सुरक्षाकर्मीहरुले आग्रह गरेका थिए ।

विदेशमन्त्री वाङको भनाइ उद्धृत गर्दै एक सुरक्षा अधिकारीले भने, ‘मलाई सामान्य पर्यटकजस्तै गरी भक्तपुर घुम्न दिनुस् । मेरो फोटो खिच्नु पर्दैन ।’

भक्तपुर घुम्न पाउँदा अत्यन्त खुसी लागेको र यहाँका ऐतिहासिक सम्पदा देखेर रमाइलो लागेको विदेशमन्त्री वाङले बताएका थिए ।

मोबाइलबाट तस्वीर खिच्दै घुमघाम गरेका वाङ प्रशन्न मुद्रामा देखिन्थे । साथै चिनियाँ राजदूत होउ याङ्छी लगायत भ्रमण दलका अन्य सदस्य पनि थिए ।

विदेशमन्त्री वाङले सामान्य नागरिक भएर पर्यटकीय क्षेत्र घुम्ने इच्छा गरे पनि उनका लागि सुरक्षा व्यवस्था कडा पारिएको थियो । यद्यपि स्थानीयबासीलाई कुनै रोकतोक गरिएको थिएन ।

चिनियाा विदेशमन्त्री वाङ गत आइतबार तीनदिने नेपाल भ्रमणमा आएका थिए । नेपाल आएलगत्तै उनले चन्द्रागिरि केबलकारको पनि भ्रमण गरेका थिए । उनले सोमबार राष्ट्रपति विद्यादेवी भण्डारी, प्रधानमन्त्री केपी शर्मा ओली र परराष्टमन्त्री प्रदीप ज्ञवालीसँग भेटवार्ता गरेका थिए ।