२०८० भदौ १२ गते १३:२९ 
१२ भदौ, काठमाडौं । पाकिस्तानी राष्ट्रिय टिमका पूर्व कप्तान तथा फास्ट बलर वासिम अक्रमले नेपालमा क्रिकेटको ठूलो चासो भएको बताएका छन् ।
एसिया कप २०२३ सुरु हुनुअघि दुबईमा भएको मुख्य प्रायोजक र ट्रफी अनावरण कार्यक्रममा पाकिस्तानी लेजेण्ड अक्रमले नेपाली क्रिकेटबारे आफू जानकारी भएको भन्दै एसिया कपका लागि योग्य रहेको बताएका हुन् ।
‘मैले उनीहरुलाई फलो गरिरहेको छु र उनीहरु छनोट भएर आएका छन् । उनीहरुले राम्रो प्रदर्शन गरेका छन्,’ अक्रमले भने, ‘मैले एउटा खेलको तस्वीर देखेको थिएँ जहाँ स्टेडियम खचाखच भरिएको थियो । आधा मानिस बाहिर रूखमा बसिरहेका थिए ।’
नेपालमा क्रिकेटको प्यासन धेरै रहेको आफूले पाएको अक्रमले बताए । ‘नेपालमा क्रिकेटको चासो ठूलो छ । र यो अझ ठुलो बन्दै गइरहेको छ’, सन् १९९२ मा पाकिस्तानका लागि वानडे विश्वकप जितेका अक्रमले भने ।
किङ अफ स्वीङ उपनामले परिचित अक्रमले सन् १९९२ को विश्वकपमा सर्वाधिक १८ विकेट लिएका थिए । पहिलो पटक एसिया कप खेल्न लागेको नेपाली क्रिकेट टोलीबारे अहिले धेरै चर्चा भइरहेको छ । त्यसमा पनि नेपालले समूह चरणमै विश्वकप क्रिकेटका पावरहाउस भारत र पाकिस्तानसँग खेल्दैछ ।
बुधबार मुल्तान क्रिकेट स्टेडियममा घरेलु टोद्यी पाकिस्तानसँग खेल्दै नेपालले एसिया कपमा डेब्यु गर्नेछ ।
रोहितकुमार पौडेलको कप्तानीमा रहेको नेपाली टोलीले भर्खरै ओडीआईमा विश्व नम्बर वान टोली बनेको पाकिस्तानसँग म्याच खेल्न लागेको हो ।
अक्रमले नेपाललले घरेलु क्रिकेट संरचनामा सुधार गर्नुपर्ने र त्यसपछि ठुला टिमसँग खेल्न तयार हुने बताएका छन् । ‘अब उनीहरूले आफ्नो संरचना, प्रथम श्रेणी र घरेलु सेटअपमा सुधार गर्नुपर्नेछ, त्यसपछि उनीहरू शीर्ष टोलीहरूसँग प्रतिस्पर्धा गर्न सुरु गर्न सक्छन् ।’
प्रतिक्रिया 4