‘भ्वाइस एक्टिङ एन्ड डबिङ’ तालिमबाट १७४ प्रशिक्षार्थी लाभान्वित

News Summary

Generated by OK AI. Editorially reviewed.

चलचित्र विकास बोर्डद्वारा आयोजित तीन दिने ‘भ्वाइस एक्टिङ एण्ड डबिङ’ तालिम सफलतापूर्वक सम्पन्न भएको छ।
भारतीय भ्वाइस विशेषज्ञ अमित देओन्दीको प्रशिक्षणमा १७४ जना प्रशिक्षार्थीले भ्वाइस एक्टिङ, डबिङ प्रविधि र संवाद अभिव्यक्ति सिकेका छन्।
बोर्ड अध्यक्ष दिनेश डीसीले भने, ‘भ्वाइस एक्टिङ र डबिङ केवल प्रविधि मात्र होइन, यो अभिनयको आत्मा हो’ र यसले नेपाली चलचित्रलाई नयाँ बजार र दर्शक दिलाउन सक्छ।

काठमाडौं । चलचित्र विकास बोर्डद्वारा आयोजित तीन दिने ‘भ्वाइस एक्टिङ एण्ड डबिङ’ तालिम सफलतापूर्वक सम्पन्न भएको छ ।

हलिउड तथा बलिउडका विभिन्न अन्तर्राष्ट्रिय प्रोजेक्टमा काम गरिसकेका भारतीय भ्वाइस विशेषज्ञ अमित देओन्दीको प्रमुख प्रशिक्षणमा सञ्चालन भएको तालिमबाट १७४ जना प्रशिक्षार्थी लाभान्वित भएका छन् ।

तालिममा सहभागीले भ्वाइस एक्टिङ, डबिङ प्रविधि, पात्रअनुसार आवाज प्रयोग, संवाद अभिव्यक्ति, स्टुडियो डबिङ प्रक्रिया तथा साउन्ड एडिटिङ सम्बन्धी सैद्धान्तिक तथा प्रयोगात्मक ज्ञान हासिल गरेका छन् ।

सहभागीले तालिमलाई अत्यन्तै व्यवहारिक, प्रभावकारी र अन्तर्राष्ट्रिय स्तरको अनुभव प्रदान गर्ने खालको भएको प्रतिक्रिया दिए । समापन समारोहमा बोर्ड अध्यक्ष तथा निर्देशक दिनेश डीसीले नेपाली चलचित्रलाई विश्वस्तरमा पुर्‍याउन आवाज र अभिनयको संयोजन अत्यन्त महत्वपूर्ण रहेको बताए ।

उनले भने, ‘भ्वाइस एक्टिङ र डबिङ केवल प्रविधि मात्र होइन, यो अभिनयको आत्मा हो । यसलाई सशक्त बनाउन सके नेपाली चलचित्रले नयाँ बजार र नयाँ दर्शक प्राप्त गर्न सक्छ ।’

प्रमुख प्रशिक्षक देओन्दीले नेपाली सहभागीको उत्साह र प्रतिभाको प्रशंसा गर्दै भविष्यमा अझ उन्नत सहकार्यको सम्भावना रहेको बताए । उनले भने, ‘नेपाली कलाकारमा अद्भुत क्षमता छ । सही प्रशिक्षण र निरन्तर अभ्यासले यहाँको भ्वाइस एक्टिङलाई अन्तर्राष्ट्रिय स्तरमा पुर्‍याउन सकिन्छ ।’

बोर्डका अनुसार तालिमले चलचित्र क्षेत्रमा भ्वाइस एक्टिङ र डबिङको गुणस्तर सुधार गर्दै दक्ष जनशक्ति उत्पादनमा महत्वपूर्ण योगदान पुर्‍याउने अपेक्षा गरिएको छ ।