२१ बैशाख, काठमाडौं । प्रधानन्यायाधीश सुशीला कार्की विरुद्धको महाअभियोग प्रस्ताव फिर्ता लिन नेकपा एमालेले गरेको आग्रह प्रधानमन्त्री प्रचण्डले अस्वीकार गरेका छन् ।
सभामुखको कार्यकक्ष सिंहदरबारमा बिहीबार भएको छलफलमा प्रमुख प्रतिपक्षी एमालेका अध्यक्ष केपी ओलीले महाअभियोग फिर्ता लिन आग्रह गरेका थिए । तर, प्रधानमन्त्री प्रचण्डले आफू एक्लैले महाभियोग फिर्ताको निर्णय लिन नसक्ने बताएका छन् ।
फिर्ता नलिए संसदमा तत्काल पेश गर्न आग्रह गरे । कार्कीको कार्यकाल एक महिना केही दिन मात्र बाँकी रहँदा महाअभियोग आएको भन्दै एमाले नेताहरुले यसलाई लामो समय संसदमै अड्काएर राख्न नहुने बताए । स्रोतले भन्यो, ‘एमालेले तत्काल निर्णय गर्नुपर्छ । छलफल र समितिमा पठाएर अड्काइ राख्न मिल्दैन भनेको छ ।’
एमालेले महाअभियोगबारे संसदमा कुन दिन भोटिङ गर्ने तय हुनु पर्ने शर्त राखेको छ । कार्यकाल रहँदासम्म महाअभियोगबारे संसदले निर्णय नगर्नु बदनियतपूर्ण हुने उसले बताएको छ ।
महाअभियोगलाई लिएर बैठक अवरुद्ध गर्ने प्रमुख विपक्षी नेकपा एमालेको चेतावनीपछि व्यवस्थापिका संसदको बैठक सूचना टांसेर स्थगित भएको छ ।
संसद बैठक सूचना टाँसेर स्थगित
एमालेको शर्त अनुसार भोटिङ गर्ने दिन तोकिएन । कार्यव्यवस्था परामर्श समितिको बैठकमा एमालेले संसद बैठक अघि बसेको महाअभियोगलाई लिएर बैठक अवरुद्ध गर्ने चेतावनीपछि व्यवस्थापिका संसदको बैठक सूचना टांसेर स्थगित भएको छ ।
एमाले प्रमुख सचेतक भानुभक्त ढकालले महाअभियोग फिर्ता लिन वा संसदको प्रक्रियामा लगेर ४/५ दिनमा नै टुंगो लगाउन माग गरे । अन्यथा संसद बैठक अवरुद्ध गर्ने चेतावनी दिए ।
दलहरुबीच सहमति जुटेन र सभामुख ओनसरी घर्ती मगरले राजनीतिक सहमतिका लागि भन्दै सूचना टाँसेर संसद बैठक स्थगित गरिन् । एमाले संसदीय दलका उपनेता सुवासचन्द्र नेम्वाङले महाअभियोग लगाउने कुनै आधार विना नै सरकारले गलत नियत र गलत ढंगले महाअभियोग प्रस्ताव आएको र आफूहरुले संसद चल्न नदिने बताएपछि सभामुखले राजनीतिक सहमतिका लागि बैठक स्थगित गरेको जानकारी दिए ।
बजेट अगावै दोस्रो चरणको चुनाव गर्न छलफल
सत्तारुढ नेकपा माओवादी केन्द्र र प्रमुख विपक्षी दल नेकपा एमालेका शीर्ष नेताहरुबीच दोस्रो चरणको चुनाव बजेट अगाबै सार्नेबारे पनि कुराकानी भएको छ ।
सरकारले दोस्रो चरणको चुनाव जेठ ३१ गते गते निर्णय गरेको छ । पहिलो चरणको चुनाव बैशाख ३१ मा हुँदैछ ।तर, एमालेले जेठ १५ मा बजेट ल्याउनु पर्ने र त्यसअघि नै दोस्रो चरणको चुनाव गर्नु पर्ने अडान राखेको छ । उसले जेठ १० सम्म दोस्रो चरणको चुनाव गरिसक्नु पर्ने अडान लिएको छ ।
छलफलमा प्रधानमन्त्री प्रचण्डले यसबारे मधेसी मोर्चासहितका अन्य दलसँग कुरा गर्ने बचन दिएका छन् ।‘मुख्य कुरा चुनाव हुनुपर्छ भन्ने हो । एउटा बैशाख ३१ मा चुनाव हुन्छ । अर्को चरणको चुनावको हकमा बजेट र त्यसलाई कसरी मिलाउने सकारात्मक ढंगले छलफल गर्ने भन्ने भएको छ’ भेटमा माओवादी नेता नारायणकाजी श्रेष्ठ प्रकाशले भने, ‘निर्वाचन आयोग, मधेसी मोर्चा सबै पक्षसँग छलफल गरेर एउटा निकासमा पुग्न सकिन्छ ।’
