लाप्राक र बारपाकको विकासका लागि पहल गर्छु : नेपाल

४ चैत, गोरखा । पूर्वप्रधानमन्त्री माधवकुमार नेपालले भूकम्पले क्षति पुर्याएका गोरखाको लाप्राक र बारपाकलगायतका क्षेत्रको विकासका लागि पहल गर्ने प्रतिबद्धता जनाएका छन् ।

नेकपा एकीकृत समाजवादीले लाप्राकमा शुक्रबार गरेको कार्यक्रममा अध्यक्षसमेत रहेका नेपालले लाप्राकसम्म सडकबाटो स्तरोन्नति, स्वास्थ्य, खानेपानी तथा बिजुलीको पहुँच पुर्याउन सम्बन्धित निकायमार्फत पहल गर्ने बताए ।

लाप्राकको नमुनाबस्तीमा खानेपानीको अभाव भएको त्यहाँका नागरिकले गुनासो गरेपछि उनले राजधानी फर्किएर खानेपानी मन्त्रीलाई समस्याको जानकारी गराउने बताए । ‘लाप्राकसम्म पुग्न सडकमा ढल, बाटो निर्माणको काम त भइरहेको छ”, उनले भने , ‘यसलाई अझैँ गति दिनुपर्ने आवश्यकता छ ।’

लाप्राकसम्म नेपाल विद्युत प्राधिकरणको केन्द्रीय प्रशारण लाइन जडान छिटोभन्दा छिटो गर्नुपर्ने समेत उनले बताए ।  ‘विकासका लागि सरकार र मन्त्रीलाई घचघच्याउने काम मेरो हो,’  अध्यक्ष नेपालले भने, ‘तपाईहरु पनि लाग्नुस्, सामूहिकतामा काम गर्न सकियो भने विकास सजिलै हुनसक्छ ।’