शरीरको बोसो हटाउने लाइपोसक्सन सर्जरी के हो ?

शरीरको कुनै भागमा अतिरिक्त बोसो जम्मा हुँदा त्यो भाग भद्दा देखिन्छ । जसकारण शरीरको आकार बिग्रिन्छ । यो समस्याबाट छुटकारा पाउन धेरैले व्यायाम र योग गर्छन्, विभिन्न औषधि समेत सेवन गर्छन् । तैपनि, समस्याको समाधान नभएर निराश हुन्छन् ।

पछिल्लो समय शरीरको अतिरिक्त बोसो हटाउन नयाँ प्रविधि भित्रिएको छ लाइपोसक्सन सर्जरी । लाइपोसक्सन कस्मेटिक सर्जिकल प्रक्रिया हो । यस शल्यक्रियाको सहायताले पेट, ढाड, कम्मर, छाती, तिघ्रा, पाखुरा, घाँटी वा कम्मर जस्ता शरीरका विभिन्न भागबाट अतिरिक्त अर्थात् अनावश्यक बोसो हटाइन्छ । यो शल्यक्रिया अनुभवी र दक्ष प्लास्टिक सर्जनको निरीक्षणमा गरिन्छ । शरीरको जुन भागमा बोसो जम्मा भएको छ त्यो भागमा एउटा सानो पाइप छिराएर त्यो पाइपको माध्यमबाट नै बोसो निकालिन्छ ।

लाइपोसक्सन सर्जरीका पनि विभिन्न विधि छन् । एउटा परम्परागत लाइपोसक्सन जसमा ‘ट्युमसेन्ट’ भन्ने एनेस्थेसिया दिएर एउटा पाइप छिराएर बोसो निकालिन्छ । अहिले लाइपोसक्सनको नयाँ प्रविधि भित्रिएको छ जसलाई ‘स्मार्ट लाइपोसक्सन’ पनि भनिन्छ । स्मार्ट लाइपोसक्सनमा लेजरले पहिले बोसोलाई पगालेर त्यसपछि मात्र तान्ने गर्छ ।

स्मार्ट लाइपोसक्सनबाट मुख्यतया दुईवटा फाइदा हुन्छन् । एउटा यसले सबै ठाउँबाट सामान रुपमा बोसो तान्ने भएकाले त्यो भागको आकार बिग्रिंदैन । साथै जुन ठाउँबाट बोसो तानिन्छ यो भागको छाला पनि कसिलो बनाउने भएकाले सर्जरीपछि छाला झोल्लिने, चाउरी पर्ने समस्या हुँदैन ।

अर्को स्मार्ट लाइपोसक्सनबाट शरीरको सानो सानो भाग (जस्तो चिउँडो, आइलिड), आँखाको वरिपरिको भागबाट पनि बोसो निकाल्न र छाला तन्काउन सकिन्छ ।

अन्तर्राष्ट्रिय निर्देशिका अनुसार लाइपोसक्सनबाट एक पटकमा चारदेखि पाँच लिटर बोसो मात्र निकाल्न मिल्छ ।

तौल नियन्त्रणमा पनि उपयोगी हुन्छ ?

कुनै पनि प्रकारको लाइपोसक्सन तौल नियन्त्रणका लागि उपयोगी हुँदैन । यसले निश्चित भागको बोसो हटाउन मात्र उपयोगी हुन्छ । तर शरीरको एउटा भागको बोसो घटेर सुन्दर देखिएपछि त्यसको प्रेरणाले मानिसहरूले डाइट र व्यायाममा ध्यान दिएर तौल नियन्त्रण गरेको भने पाइएको छ ।

कसलाई उपयोगी ?

कसैको जति व्यायाम गरे पनि, जति डाइट प्लान गरे पनि शरीरको केही भागको बोसो घट्दै घट्दैन भने उनीहरूका लागि यो बढी उपयोगी हुन्छ ।

सामान्यतया सबै उमेर समूहले यो सर्जरी गर्न मिल्छ । कसैलाई मधुमेह र थाइराइड समस्या छ भने उनीहरूले पनि यो सर्जरी गर्न मिल्छ । तर उनीहरूले मधुमेह र थाइराइडको उपचार गरेको हुनुपर्छ, रोग नियन्त्रणमा हुनुपर्छ ।

मोटोपनको कारण विभिन्न दीर्घकालीन समस्या निम्तिन्छ भन्ने कुरा विभिन्न अध्ययनले पत्ता लगाएका छन् । दीर्घकालीन रोगको जोखिम बढाउन मोटोपनमा पनि पेटमा जमेको बोसो बढी जिम्मेवार हुन्छ भन्ने कुरा केही अध्ययनले देखाएको छ । यस्तोमा लाइपोसक्सन गरेर पेटको बोसो हटाउँदा विभिन्न रोगको जोखिमबाट बच्न सकिन्छ ।

लाइप्रोसक्सनका अन्य फाइदा

सामान्यतया यो शल्यक्रियाको क्रममा शरीरको त्यो भागमा धेरै सानो भागबाट पाइप छिराइने भएकाले घाउ दागको जोखिम हुँदैन ।

शल्यक्रियाको सम्पूर्ण प्रक्रियामा बिरामीलाई कुनै पनि दुखाइ वा अन्य कुनै पनि समस्याको सामना गर्नु पर्दैन । लाइपोसक्सन सर्जरीपछि बिरामीलाई निको हुन धेरै समय लाग्दैन । एक दिनमा नै शल्यक्रिया सकिन्छ । अस्पताल भर्ना भएर बस्नु पर्दैन ।

सर्जरीको मद्दतले शरीरलाई सुन्दर र आकर्षक बनाउन सकिन्छ ।

कुनै साइड–इफेक्ट ?

स्मार्ट लाइपोसक्सनको दीर्घकालीन साइड-इफेक्ट छैन । तर लेजरबाट गरिने लाइपोसक्सनमा छालाको कुनै ठाउँमा पोलेर सानोतिनो घाउ हुनसक्छ । यस्तो साइड-इफेक्टबाट बच्न विशेषज्ञसँग यो सर्जरी गर्नु उपयुक्त हुन्छ ।

कति लाग्छ खर्च ?

स्मार्ट लाइपोसक्सन शरीरको कुन-कुन भागमा गर्न लागेको हो त्यसैअनुसार खर्च निर्धारण हुन्छ । सामान्यतया सर्जरीको खर्च ८० हजारदेखि सुरु हुन्छ ।

यो पनि पढ्नुहोस

वर्षायाममा छालाको अनेक समस्या, के छ उपचार ?

यो पनि पढ्नुहोस

घाउ-खटिरा असामान्य रुपमा बढ्नु छालाको क्यान्सर पनि हुनसक्छ

यो पनि पढ्नुहोस

मेरो कपाल फुल्न थाल्यो, के गरौं ?

यो पनि पढ्नुहोस

कपाल उमार्न प्रयोग गरिने कोलाजेन सप्लिमेन्ट कति सुरक्षित ?