सुकुमबासी बस्तीमा डोजर चलाउन बन्द गर्न माग

News Summary

Generated by OK AI. Editorially reviewed.

अखिल नेपाल सुकुमबासी संघले सुकुमबासी बस्तीहरूमा डोजर लगाएर आतंक सिर्जना गर्न तत्काल बन्द गर्न माग गरेको छ।
संघका इन्चार्ज नरेन्द्र खड्काले चैत ९ गते टोखा नगरपालिका वडा ७ को धापासीमा १८ घरमा डोजर चलाइएको बताए।
संघले सरकारलाई निर्वाचन बाहेक अरू काम गर्ने अधिकार नभएको भन्दै सुकुमबासी बस्तीमा डोजर चलाउने आवश्यकतामा प्रश्न उठाएको छ।

११ चैत, काठमाडौं । अखिल नेपाल सुकुमबासी संघले सुकुमबासी वस्तीहरूमा डोजर लगाएर आतंक सिर्जना गर्न बन्द गर्न माग गरेको छ ।

संघले बुधबार पत्रकार सम्मेलन गरी सुकुमबासी बस्तीहरूमा डोजर लगाउन तत्काल बन्द गर्न माग गरेको हो ।

सरकारले कानुनी रूपमा भूमिहीन, अव्यवस्थित, सुकमबासी समस्या समाधान गर्नुपर्नेमा उल्टो काठमाडौं उपत्यकाका विभिन्न स्थानमा रहेका सुकुमबासी बस्तीहरूमा डोजर लगाएर आतंक सिर्जना गरेको संघको आरोप छ ।

अखिल नेपाल सुकुमबासी संघका इन्चार्ज नरेन्द्र खड्काले काठमाडौंको टोखा नगरपालिका वडा ७ मा रहेको धापासीको सुकमबासी बस्तीमा रहेको १८ घरमा चैत ९ गते डोजर चलाइएको बताए । त्यसअघि काठमाडौंको सिफलमा र भक्तपुरमा रहेको सुकुमबासी बस्तीमा पनि डोजर चलाइएको उनको भनाइ छ ।

उनले वर्तमान सरकारलाई निर्वाचन बाहेक अरू काम गर्ने कुनै अधिकार नभएको उल्लेख गर्दै सुकुमबासी बस्तीमा डोजर चलाउने आवश्यकता किन पर्‍यो ? भन्दै प्रश्न गरे ।

उनले सुकुमबासी बस्तीमा डोजर चलाएको विषयमा सरकार बनाउन लागेको दल मौन बसकोमा पनि आपत्ति जनाए ।