उद्धार गर्न तिलगाउँ पुगेका सुरक्षाकर्मी क्षतिको विवरण टिपेर फर्किए

जेठ ४, काठमाडौं । हुम्लाको नाम्खा गाउँपालिका–६ तिलगाउँमा लेदोसहित पहिरो गएपछि उद्धारका लागि भनेर पुगेको टोली क्षतिको विवरण संकलन गरेर फर्केको छ ।

२ जेठको साँझ ७ बजेतिर तिलगाउँ पुगेको सशस्त्र प्रहरी र नेपाल प्रहरीको टोली क्षतिको विवरण संकलन गरेर आइतबार बिहान फर्केको हो । हुम्लाका प्रमुख जिल्ला अधिकारी नारायण पाण्डेयले पनि सुरक्षाकर्मीको टोली गएको तर अग्लो ठाउँमा पुगेपछि स्वास्थ्य समस्या भएर फर्केको बताए ।

यो पनि पढ्नुहोस

लेदोसहितको पहिरोले हुम्लाको तिल गाउँ जोखिममा, स्थानीयलाई खुला चौरमा सारियो

१ जेठको राति ११ बजेतिर लेदोसहितको पहिरो आएको जानकारी पाएपछि २ जेठको बिहान १० बजेतिर सशस्त्रको बीओपी हिल्साबाट वरिष्ठ हवल्दार लोकबहादुर बुढाको कमाण्डमा ७ जना र इलाका प्रहरी कार्यालयबाट प्रहरी हवल्दारको कमाण्डमा ६ जना गरी १३ जनाको टोली खटिएको थियो ।

उक्त टोली राति मात्रै घटनास्थल पुगेको थियो । त्यो रात केही गर्न सम्भव थिएन । भोलिपल्ट शनिबार भने सुरक्षाकर्मीको टोलीले क्षतिको विवरण संकलन गरेर फर्केको नाम्खा–६ का वडाध्यक्ष पाल्जोर लामाले अनलाइनखबरलाई बताए ।

यो पनि पढ्नुहोस

लेदोसहितको पहिरोले जलविद्युत्‌मा क्षति, कुलो र खानेपानी बगायो

‘रिपोर्ट–रिपोर्ट भन्दै प्रहरीको टोली पनि फर्कियो । जोखिम अझै कायमै छ । यतिबेला कोही छैनन्, केही पनि छैन,’ उनी भन्छन् ।

सशस्त्र प्रहरी बलका सहप्रवक्ता तथा डीएसपी शैलेन्द्र थापाले विपद् उद्धार तथा बन्दोबस्तीका सामानसहितको टोली घटनास्थलमा खटिएर काम गरेको बताए । उक्त टोलीले स्थानीयलाई सुरक्षित ठाउँमा सारेको थियो ।

तिलगाउँमा मानवीय क्षति केही नभए पनि अन्य जोखिम भने रहेको वडाध्यक्ष लामा बताउँछन् ।

यो पनि पढ्नुहोस

तिल गाउँबाट वडाध्यक्ष भन्छन् : पहिरोको विपत्ति थामिनसक्नु छ, यहाँ कोही छैनन्, केही छैन

उच्च जोखिममा परेपछि ३२ जनालाई खुला चौरमा सारिएको छ । जसमा २१ महिला, ९ पुरुष र २ बालक छन् । यो गाउँमा ५० घरधुरी मध्ये १८ घरधुरी अहिले बसोबास गर्दै आएका थिए ।

लेदोसहितको पहिरोका कारण तिल्चुङ खोलामा रहेका ५ वटा काठे पुल बगाएको छ । सोनाम साङमु लामाको घरको छत पहिरोका कारण प्वाल परेको छ । छे बुटी लामाको घर चर्किएको छ । धर्मशालाको छत समेत भत्किएको छ ।

१५ किलोवाटको जलविद्युत् भवन, मेसिन, कुलोमा समेत क्षति पुगेको छ । करिब ४ सय रोपनीमा सिँचाई गर्ने कुलो र खानेपानी समेत बगाएको छ । यो घटनाबारे केन्द्र सरकार भने अहिलेसम्म बेखबर छ ।

यो पनि पढ्नुहोस

हुम्लाका सीडीओ भन्छन्- तिलगाउँका बासिन्दा हेलिकप्टर कुर्दैछन्