काठमान्डु गुर्खाज 2024

काठमाडौं स्पोर्ट्स डेभलपमेन्ट भेन्चरको स्वामित्वमा रहेको काठमान्डु गुर्खाज बागमती प्रदेशभित्रको दुईमध्ये एक टोली हो । गुर्खाजले बागमती प्रदेशभित्र काठमाडौं उपत्यकाको प्रतिनिधित्व गर्नेछ ।

जुनसुकै फ्रेन्चाइज खेल हुँदा पनि काठमाडौंको टिम घरेलु टिमको रुपमा रहने गर्छ र स्थानिय समर्थन पनि हुन्छ । त्यसले गर्दा काठमाडौंलाई राम्रो प्रदर्शन गर्ने दबाब पनि हुनेछ ।

काठमान्डु गुर्खाजको मार्की खेलाडीमा राष्ट्रिय टिमका मिडियम पेस बलर करण केसी छन् । करण बाहेक राष्ट्रिय टिमका ब्याटर भिम शार्की छन् । गुर्खाजमा स्टार खेलाडी देखिँदैन । तर वानडे शैलीमा खेल्ने ब्याटरहरु शंकर राना, सुमित महर्जन, राजु रिजाल जस्ता खेलाडी छन् ।

यसबाहेक राष्ट्रिय टिमबाट खेलिसकेका स्पीनर शाहब आलम र यू१९ टिमबाट खेलेका स्पीनर दिपेश कँडेल छन् ।

अक्सनका बेला काठमान्डु गुर्खाजलाई कमजोर टोली भनिएपनि विदेशी खेलाडी अनुबन्धपछि गुर्खाज टोली सन्तुलित देखिएको छ ।

यस्तै काठमाडौंले नेपाली खेलाडीलाई साथ दिन राम्रा विदेशी खेलाडी भित्र्याएको छ । गुर्खाजले एनपीएलका लागि ५ विदेशी खेलाडी अनुबन्ध गरेको छ ।

जसमा नामिबियाका कप्तान जेरार्ड इरासमस र नेदरल्याण्ड्सका युवा ओपनर माइकल लेभिट छन् । यस्तै इंग्लयाण्डका तीन खेलाडी स्टेफेन इस्कीनाजी, डान डौथवेट, नाथन सोटर छन् ।

काठमान्डु गुर्खाजको मुख्य प्रशिक्षकमा नेपालको पहिलो पुस्ताका अन्तर्राष्ट्रिय खेलाडी तथा राष्ट्रिय टिमका पूर्व सहायक प्रशिक्षक बसन्त शाही ठकुरी छन् । काठमान्डु गुर्खाजका अध्यक्ष उपेन्द्र देवकोटाले एनपीएलको ट्रफी आफ्नै टिमले जित्ने दावी गरेका छन् ।

काठमान्डु गुर्खाजको क्रिकेट एम्बासडरमा नेपाली राष्ट्रिय महिला टिमकी कप्तान इन्दु वर्मा छन् ।

काठमान्डु गुर्खाजको टिम :

ओनर : काठमाडौं स्पोर्ट्स डेभलपमेन्ट भेन्चर (केएमजी, मेडिसिटी, याक एण्ड यती)

मार्की प्लेअर : करण केसी

अन्य खेलाडी : भीम शार्की, शाहब आलम, रासिद खान, दिपेश कँडेल, कृष्ण कार्की, सुमित महर्जन, शंकर राना, राजु रिजाल, प्रतीक श्रेष्ठ, विवेक केसी

विदेशी खेलाडी : माइकल लेभिट, जेरार्ड एरासमस, स्टेफेन इस्कीनाजी, डान डौथवेट, नाथन सोटर

आइकोनिक प्लेअर : क्रिस कार्की

मुख्य प्रशिक्षक : बसन्त शाही ठकुरी

क्रिकेट ब्रान्ड एमबासडर: इन्दु बर्मा

बलियो पक्ष : टप अर्डर र विदेशी खेलाडी

अक्सनका बेला काठमान्डु गुर्खाज टिमलाई धेरैले कमजोर टिम भनेर चर्चा गरेका थिए । तर काठमाडौं राम्रो विदेशी खेलाडी अनुबन्ध गरेर टिमलाई सन्तुलित बनाउने प्रयास गरेको छ ।

यस पटक काठमाडौंको बलियो पक्ष नै विदेशी खेलाडी देखिएको छ । किनभने नेपालमा आएर अन्तर्राष्ट्रिय खेल खेलिसकेका नामिबयाका कप्तान जेरार्ड इरासमस र नेदरल्याण्ड्सका युवा ब्याटर माइकल लेभिटलाई काठमाडौंले अनुबन्ध गरेको छ । दुवै एसोसिएटमा राम्रो खेलाडी हुन् ।

यस बाहेक बिग बास लिगमा पर्थ स्कोर्चर्सका लागि खेलिसकेका इंग्ल्याण्डका ब्याटर स्टेफेन इस्कीनाजीसहित अलराउण्डर डान डौथवेट र नाथन सोटर विदेशी खेलाडीमा छन् ।

एनपीएलमा एक टिममा चार विदेशी खेलाडी खेलाउन पाउने नियम छ । लेभिट, इस्किनाजी र इरासमस टप अर्डरमा खेल्छन् भने अलराउण्डर डौथवेट र नाथन सोटर मध्ये एक खेलाडी लोअर अर्डरमा खेल्छन् । डौथवेइट पेस बलिङ अलराउण्ड र सोटर स्पीन बलिङ अलराउण्डर हुन् ।

विदेशी खेलाडी थपिएपछि गुर्खाजको टप अर्डर पनि राम्रो देखिएको छ । माइकल लेभिट इस्किनाजीसँगै नेपाली ब्याटर भिम शार्की, सुमित महर्जन र शंकर रानाले विदेशी खेलाडीलाई साथ दिनेछन् ।

कमजोर : पेस बलिङ

स्पीन बलिङमा सन्तुलित देखिएपनि गुर्खाजको पेस बलिङ भने कमजोर देखिन्छ । मार्की प्लेअर करण केसीसहित राशिद खान र कृष्ण कार्की पेस बलिङ अलराउण्डर हुन् ।

करणबाहेक रासिद खान र कृष्ण कार्की राष्ट्रिय टिममा छैनन् । रासिद राष्ट्रिय टिममा पुनरागमन गर्ने योजनामा छन् भने कृष्ण करियरको अन्तिमतिर छन् । अलराउण्डर डौथवेटले पेस बलिङमा सघाउने सक्नेछन् तर समग्रमा पेस अट्याक कमजोर देखिन्छ ।

बरु ब्याटिङमा लोअर अर्डरमा करण र राशिदसँगै डौथवेटले पनि योगदान गर्न सक्छन् । स्पीनमा भने शाहब बलम र युवा दिपेश कँडेल छन् । यो जोडीलाई पार्ट टाइम बलिङ गर्ने नामिबियाका कप्तान इरासमसले सघाउनेछन् ।

टप अर्डरपछिका खेलाडीहरु बलिङ अलराउण्डर रहेकोले फिनिसिङमा पनि काठमाडौं केही कमजोर देखिन्छ ।