महानगरले सम्पत्ति भाडामा लगाउने ठेक्काको समयावधि छोट्यायो  

५ फागुन, काठमाडौं । काठमाडौं महानगरपालिकाले आय कर ठेक्का लगाउने समयावधि छोट्याएको छ । महानगरले आन्तरिक आय संकलन हुने शुल्क, दस्तुर तथा सम्पत्ति भाडामा लगाउँदा ठेक्का दिने प्रक्रिया कार्यविधि बनाएर छोट्याएको हो ।

महानगरले आय ठेक्का दिँदा यसअघि सार्वजनिक खरिद ऐन अनुसार ३५ दिने सूचनाबाट बोलपत्र आहवान हुँदै आएको थियो । तर अब ठेक्का रकमको आधारमा बोलपत्र आह्वानको सूचना मिति तोकिने भएको छ । कार्यविधिमा महानगरले सार्वजनिक सूचना प्रकाशित गर्दा ठेक्का लगाउने अनुमानित रकम २० लाख रुपैयाँसम्म भए १५ दिनको,  २० लाख भन्दा बढी १ करोडसम्मको भए २१ दिनको र १ करोड रुपैयाँभन्दा बढी जतिसुकै भए पनि कम्तीमा ३० दिनको सूचना सार्वजनिक रूपमा प्रकाशन गर्ने उल्लेख छ । महानगरले लगाउने आय ठेक्का कम्तीमा एक वर्षको लागि हुने ऐनमा उल्लेख रहेको छ ।

ठूला ठेक्कामा मेयरलाई अधिकार

महानगरले दिने ठेक्काको आय अनुमानमा महानगरपालिका प्रमुखलाई धेरै अधिकार दिएको छ । महानगरले आय अनुमान गर्दा वार्षिक १० करोडसम्मको प्रमुख प्रशासकीय अधिकृतबाट र वार्षिक १० करोडभन्दा बढीको प्रमुखबाट गर्नुपर्ने कार्यविधि महानगरले ल्याएको हो । यस्तै महानगरपालिकाको दीर्घकालीन असर पर्ने रचना तयार गररे आय ठेक्का दिनको लागि गरिने अनुमानको स्वीकृति कार्यपालिकाबाट गर्नु पर्ने उल्लेख गरेको छ ।

आय अनुमान जस्तै ठेक्का स्वीकृतीमा पनि मेयरको सबैभन्दा धेरै अधिकार रहने कार्यविधिमा रहेको छ । १५ करोडसम्मको बोलकबोल भएको प्रमुख प्रशासकीय अधिकृतबाट ठेक्का स्वीकृति हुनेछ भने १५ करोडभन्दा माथिको बोलकबोल भएमा मेयरबाट स्वीकृति हुने व्यवस्था महानगरको कार्यविधिमा उल्लेख छ ।

कार्यविधि अनुसार ठेक्का लिनेले महानगरपालिकालाई तिर्नु पर्ने आय रकम सम्झौतामा उल्लेख भएबमोजिम अग्रिम रूपमा बुझाउनुपर्ने व्यवस्था रहेको छ । अग्रिम रूपमा बुझाउनुपर्ने आय रकमको किस्ता नबुझाएमा सम्झौता भंग हुने र आय किस्ता असुलीको कारबाही अगाडि बढाउने व्यवस्था महानगरले गरेको छ ।

महानगरपालिकाले जडीबुटी, कवाडी र जीवजन्तुजस्ता एकीकृत रूपमा कर संकलन गर्दा लागत न्यूनीकरण, स्रोतसाधनको अधिकतम उपयोग, प्रभावकारी सेवाप्रवाह हुने अवस्था आएमा अन्य पालिकासँग साझेदारी वा संयुक्त आय ठेक्का लगाउन सक्ने व्यवस्था समेत गरेको छ ।