टेलर स्विफ्टद्वारा २ विश्व रेकर्ड : धेरै रि-पोस्ट हुने इन्स्टाग्राम पोस्ट र धेरै सुनिने पडकास्ट

लस एन्जलस । पपस्टार टेलर स्विफ्ट र उनका प्रेमी ट्राभिस केल्सीले मंगलबार इन्स्टाग्राम पोस्टमार्फत इन्गेजमेन्ट घोषणा गरे ।

यो खबरलाई लिएर फेसबुक, इन्स्टाग्राम र ह्वाट्स-एपको माउ कम्पनी मेटाले रोचक तथ्य बाहिर ल्याएको छ । त्यो पोस्टलाई इन्स्टाग्राममा १ मिलियन पटक रि-पोस्ट गरिएको मेटाले जनाएको छ ।

बिलबोर्डले प्राप्त गरेको यो तथ्यांक अन्य कुनै सामाजिक संजालमा गरिएका कुनैपनि पोस्टको भन्दा सर्वाधिक छ । अर्थात, टेलर स्विफ्टको यो पोस्टले रेकर्ड राख्यो ।

इन्गेजमेन्ट घोषणा भएको ६ घण्टामै उनीहरूले कीर्तिमान रचेका हुन् । पोस्ट सेयर भएको १ घण्टामै यसले १ करोड ४० लाख लाइक बनायो । जबकि अहिलेसम्म ३ करोेडभन्दा धेरै लाइक छन् ।

स्विफ्टले फुटबल खेलाडी क्रिस्टियानो रोनाल्डोको इन्स्टाग्राम रेकर्डलाई उछिनेको अन्तर्राष्ट्रिय संचारमाध्यमले जनाएका छन् ।

पडकास्टमा पनि टेलर स्विफ्टको रेकर्ड

एकपछि अर्को रेकर्ड ! टेलर स्विफ्ट सहभागि पडकास्टलाई अहिलेसम्मकै सर्वाधिक पटक सुनिएको छ ।

गिनिज वर्ल्ड रेकड्र्सले मंगलबार गरेको घोषणाअनुसार, स्विफ्टको हालैको र पहिलो पोडकास्ट ‘न्यू हाइट्स’लाई अहिलेसम्मकै धेरै सुनिएको छ । यो पडकास्टलाई उनका प्रेमी ट्राभिस केल्सी र उनका भाइ जेसन केल्सीले होस्ट गरेका थिए । युट्युब पडकास्टमा यसले कीर्तिमान रचेको हो ।

अगस्ट १३ मा युट्युबमा रिलिज हुँदा यो पोडकास्टलाई एकैसाथ १३ लाख दर्शकले हेरेको रेकर्ड काउन्टरले जनाएको छ । मंगलबारसम्म, यो पोडकास्टको एपिसोडलाई युट्युबमा २ करोड भ्यूज प्राप्त भएको छ ।